தொலைத்து விட்ட முகம் !

உலகம் என்னும் நாடக மேடையில்
இன்னொரு நடிகனாயிருக்க என்றுமே
என் மனம் ஒப்புதல் அளித்ததில்லை..

முகங்களைத் தேடி அதிகம் கிடைக்காமல்
நான் அலுத்துப் போயிருந்தாலும்
என் முகத்தை மட்டும் தொலைக்காமல்
கவனமாக இருந்தேன்..

முகமென்று கண்டு மூடியாய் உணர்ந்து
விலக முடிவெடுத்த தருணத்திலும்
என் முகம் காட்டியே
என் முகம் காக்கவே
வேண்டுகோளும் விடுத்தேன்..

அதைக் காது கொடுத்து கேட்டும்
கேட்காமல், இரக்கமுமில்லாமல்
சாயங்கள் பல கலந்து
முகத்தில் தெளித்து எனையும்
நடிகனாக்கி விட்டதன்
நியாயம் தான் என்ன !

இன்றும் நான் முகங்களைத் தேடிக்
கொண்டு தான் இருக்கிறேன்.
உன்னால் நான் தொலைத்த
என் முகத்தையும் சேர்த்து !!!